Жастар жәрдемі

Дәстүрлі қазақ қоғамында әлсізге қамқорлық көрсетуді насихаттайтын салт көп болған. Десек те, олардың бірқатары қазіргі күні ұмытылып кеткені рас. Ертеректе күз түсіп, мал саны көбейгенде хан-сұлтандар мен дәулеті тасыған байлар кедейлерге тегін мал, ақша, бұйым, тамақ үлестірген. Бұл біріншіден, кедей-кепшіктің келе жатқан қыстан аман шығуына жәрдемдесу болса, екіншіден, көптің алғысын алудың амалы десе болады. Жалпы, адамдарды бауырмалдыққа баулитын, қоғамдық қарым-қатынасты реттейтін бұл дәстүрдің игілігі көп. Осы жақсы салтты бүгінгі жастардың қолдап, жүзеге асырып келе жатқаны дұрыс бағыт деп ойлаймыз.
Биыл да өңірімізде жауын-шашын қатты болып, көптеген үйлер суға кетті, әсіресе әлеуметтік аз қамтылған отбасыларына салмақ түсті. Осыны ескерген «Ембімұнайгаз» АҚ құрылымдық бөлімшесі – Өндірістік техникалық қамту және жабдықтармен комплектациялау басқармасының жас мамандары өзара қаржы жинап, Атырау қаласында тұратын жағдайы төмен бірнеше отбасына күнделікті керек азық-түлік түрлерін таратып берді. Қайырымдылық – ізгілікті іс. Бұл еңбек ұжымындағы жас мамандардың ынтымақ-бірлігінің арқасында жүзеге асқан игілікті шара. Осындай шараларды алдағы уақытта тағы жиі өткізіп тұру жөнінде жас мамандар арасында ұсыныс жасалып, мақұлданды.

Анар Гусманова, ӨТҚжЖКБ, Жас мамандар кеңесінің мүшесі